الشفاء الحقيقي .  أن تتذكر ولا تتألم بقلم الكاتبة الصحفية نادية ميخائيل . عالم الفن والأدب

في ذكريات بتوجعك مش لأنها كانت صعبة… لكن لأنها غيرت فيك حاجة عمرها ما رجعت زي الأول.
في مواقف كل ما تفتكرها تحس بنفس الغصة… مش لأنك لسه بتحب الأشخاص دول، ولا لأنك عايش في الماضي، لكن لأنك فاكر النسخة القديمة منك قبل ما يحصل كل ده.
فاكر نفسك وأنت بتثق بسهولة… وأنت بتصدق الكلام… وأنت بتدي الأمان من غير حساب… وأنت فاكر إن اللي في قلبك هو نفسه اللي في قلوب الناس.
في مواقف مش بتوجعنا بسبب الخسارة… بتوجعنا بسبب الصدمة.
صدمة إن شخص كنت بتحلف بأخلاقه طلع أول واحد يكسر خاطرك. إن حد كنت بتدافع عنه قدام الناس كلها، سابك وقت ما احتجته. إنك تكتشف إنك كنت بتحارب الدنيا كلها عشان حد، وهو ماكانش مستعد يحارب عشانك دقيقة.
وأصعب حاجة إنك وقتها ماعرفتش تدافع عن نفسك… مش لأنك ضعيف… لكن لأنك كنت مذهول. ماكنتش مستوعب إن اللي قدامك ممكن يعمل كده أصلاً.
في مواقف بنفضل سنين نراجعها في دماغنا… “كان المفروض أرد.” “كان المفروض أمشي من أول مرة.” “كان المفروض ما أثقش.” لكن الحقيقة إن الإنسان بيتصرف على قد الحقيقة اللي شايفها وقتها، مش على قد الحقيقة اللي اكتشفها بعدين.
والسنين بتمر… والوجوه بتبعد… والأحداث تبقى مجرد ذكرى.
لكن الأعجب من كل ده… إن ربنا بيرحم القلب بطريقة غريبة.
في يوم تلاقي نفسك فاكر كل التفاصيل… المكان… الكلام… الدموع… حتى الإحساس اللي كان جواك.
لكن الشخص نفسه؟ ملامحه بقت مش واضحة. صوته نسيته. أخباره ما بقتش تفرق معاك. وجوده وغيابه بقوا واحد.
وهنا تعرف إن الشفاء مش إنك تنسى اللي حصل… الشفاء الحقيقي إنك تفتكر وما تتوجعش.
إن الذكرى تبقى موجودة… لكن ما يبقاش ليها سلطة عليك.
إنك تبص للماضي وتقول: “آه… أنا اتأذيت فعلًا.” “واتخذلت فعلًا.” “وبكيت ليالي طويلة فعلًا.”
بس الحمد لله… عدت. واللي كنت فاكر إني مش هقوم منه… قومت. واللي كنت فاكر إني مش هنساه… نسيته. واللي كنت فاكر إنه نهاية حياتي… طلع مجرد فصل واتقفل.” 
ربنا ما بيغيرش الماضي… لكنه بيغير قلبك لحد ما الماضي مايبقاش قادر يوجعك تاني.

مع خالص تحياتي . الكاتبة الصحفية نادية ميخائيل