ذكريات من زمن الريف الجميل . بقلم الكاتب والشاعر جمال موسي . عالم الفن والأدب

أعزائى القراء

كل واحد فينا له ذكريات عاشها ويتمنى يومًا منها، وخاصة إذا كانت حياة ريفية، وكلها حنين الأهل والحبايب واللمة والغيط والبهايم والأكل اللى مالى البيت، ولو قلت فى الموضوع ده سنين مش هايخلص الكلام فيه.

وفى هذه المقطوعة الشعرية ألقيت بعض الأضواء عليها، أرجو أن تنال إعجابكم.

فى الغيط زمان واحنا عيال
والهواء ع البحرى والبابور شغال
والشمس دافية والجسر التراب
والطين نشكل بيه ونرسم ألعاب

وبهايمنا مربوطة قدامنا ع الطريق
نحش ونوكلها البرسيم من غير ضيق
ونروح مدارسنا شطارة هنا وهناك
آه لو نعرف كنا مسكنا فيها بثبات

واللعب الجرى وأول دلو ولا استغماية
كانت أيام لو كنا نعرف أنها مش جاية
للعبنا كتير فى كل مكان وفى كل وقت
ومنخلصش خالص أيامنا الغالية لدلوقت

فوقت خلاص من الأحلام ولقيت نفسى
فى الهم والغلا والناس كل واحد ينسى
واللعب بالتلفونات وخلاص الحلو راح
ونبكى على زمان وياريت نعيش أفراح